Avatar
por vigo_pesqueiro

Empezamos o ano Vigo  Pesqueiro cunha visita chegada desde o Mediterráneo, desde Italia. Tratábase dunha sorpresa de aniversario e encheunos de ledicia que nos elixisen para celebralo. Tratábase da súa primeira visita a Vigo e prometéronnos que non sería a últimaJ

Foi o sábado 12 de xaneiro, un día moito frío pero cunha luz fantástica,   onde a choiva nos deu  tregua.

Comezamos a nosa visita achegándonos á frota do porto, falando sobre caladoiros,  especies e técnicas de pesca, deixamos atrás o espazo das  redeiras, os almacéns, o edificio da cooperativa,  e adentrámonos nos edificios das lonxas.

Os nosos visitantes sorprendéronse polas dimensións e o ben planificado que se atopa o espazo. Chamoulles a atención que a cidade de Vigo acolla unha segunda cidade dentro súa, o Porto de Vigo, coas súas rúas, as súas glorietas e os seus centos de empresas con tan variada actividade, de renome en toda Europa.

Fixemos un parón na nosa visita para coñecer por dentro unha destas empresas, o noso colaborador “López Novoa” a quen lle damos a grazas posto que  sen empresas altruístas como a súa, este proxecto non sería posible . Trátase dun viveiro que se atopa na vangarda da tecnoloxía, sen esquecer xamais o bo saber facer da tradición. Alí as piscinas estaban cheas de especies que a nosa “carinissima” parella de visitantes descoñecían: namoráronse dos  bogavantes coa súa metalizada cola azul, das centolas e dos  bois de mar.  Coñecimos como se almacena a mercadoría en cámaras de frío ou conxelado, como se procesa, ou como se prepara para un envío.

Unha vez finalizada a visita no viveiro, dirixímonos ao  porto orixinal de Vigo cos seus soportais e casas mariñeiras aínda en pé, continuamos polas rúas do “Casco Vello” pasando polo renovado Mercado e as súas frescas peixarías, pasando por rúa Peixaría cos seus postos de ostras e deixando a Praza da  Pedra, que desde o S.  XIX albergou un afamado mercado, subindo por unha rúa onde a artesanía tradicional segue viva, a de  Cesteiros. E coma se levásemos a “ Patela” chea de peixe para vender, terminamos a nosa visita  na antiga Praza Peixaría que a día de hoxe ven sendo a da Princesa.

A visita terminara para nós, pero a sorpresa de aniversario aínda non; para eles terminaría na mesa, coa mellor  mariscada que esperamos que Disfrutasen! Desde Vigo  Pesqueiro  sodes sempre  benvid@s.



Deja un comentario