Este pasado sábado tivemos unha visita na que percorrimos as orixes do Porto Pesqueiro de Vigo, no Casco Vello. Admiramos a ría de Vigo, que grazas á súa fantástica protección e excelente calado estivo dende tempos ancestrais nas rutas comerciais do Atlántico e do Mediterráneo, tal como evidencian os achados arqueolóxicos nos denominados castros costeiros.
Falamos de romanos, primeiros industriosos da ría, e das suas luxosas “Villae”. Xa avanzando no tempo, nos adentramos no pasado gremial do casco histórico, e nas moitas invasións que sofreu; como a do afamado corsario Francis Drake ou a dos franceses nos tempos da Reconquista.
Pola Rúa Real chegamos ata a Ribeira do Berbés, que foi do gremio dos mareantes, e no que xa non hai “dornas” ou “bous” baixo os soportais mariñeiros.
Deixamos o Berbés, e o “Percorre” levounos a visitar un dos grandes buques conxeladores que faenan no lonxano caladoiro das Malvinas.
Dámoslle as grazas a Lolo, quen nos amosou amablemente cada recuncho deste buque conxelador que se adica á pesca de sabroso calamar.
A actividade tivo o mellor dos peches amosando a riqueza que esconden as nosas augas: Un grupo de Golfiños!!
Grazas a todos @s participantes deste “Percorre” de Vigo Pesqueiro. Agardámosvos na seguinte actividade
